Am Friti Abe simer pünktlech ds Züri mit der Ethiopian Airline abgfloge. Der Flüger isch fasch läär gsi, wassech aber de nam Zwüschestop ds Mailand schlagartig gänderet het. E ruehige Flug dürd Nacht, gfougt vomene wunderschöne Sunneufgang ob de Wuuche. D Landig ds Addis Abeba isch pünktlech am 7:21 h (Ortszyt) gsi.

Bis dert aues wi am Schnüerli. Was när isch cho, sprängt der Rahme vo däm Blog. Nume soviu, mir hei am Schluss weder Pass no Boardingpass müesse zeige. Zyt het nüm glängt. Mir si Wort wörtlech ir letschte Sekunde i das Flugzüg igstige wonis witer i üses ändgültige Reiseland het bracht. 

Ds Johannisburg acho, heimer zersch ds Gepäck u när der Toyota Hilux i Empfang gno. Use usem Parkhus u scho fasch ds erst Mau uf der fautsche Site vor Strass. Linksvercher. Zum Glück isches när cho rägne, so mängisch wi der Res der Schibewüscher statt der Blinker het verwütscht 😂.

D Reis vo Johannisburg bis nach Graskop isch rund 400km läng u nach fasch 24 Stung ungerwägs e zimlechi Useforderig gsi. Dasnis d Frou im Reisebüro gseit het, mir sötte nach Sunneungergang nüm ungerwägs si, hets nid besser gmacht. Düre Gwitterräge, verbi a Cholechraftwärch u unzählige Pannefahrzüg, dür kilometerlängi Pinieplantage u immer wider dra dänke, dass dä wo entgäge chunnt scho weis, das mir uf der lingge Site richtig si. 

Nach rund vier Stung Fahrzyt heimers aber schlussändlech ohni Panne und Überfau bis ids Hotel gschafft. Erschöpft u froh simer nach üsem wouverdienete erste südafrikanische Bier ids Bett. Gspannt, wi üsi Reis witergeit.