Hüt isches witergange Richtig Durben zum Flughafe. Ungerwägs hei mir öpis schier unvorsteubars atroffe: e Lastwagestou. Mir si während rund 15 Minute mit rund 60km/h dranne verbi gfahre. Gemäss üsere Schetzig si dert rund 800 bis 1000 Lastwäge gstange. U am Schluss isch der Grund ganz eifach gsi: Bir Outobahnusfahrt hets e Chrützig gha. U die isch wäge zviu Vercher überlastet gsi. Mir heinis gar nid wöue vorsteue, wi lang dasas geit, bis au di Schofföre ihres Ziu erreicht hei.

Mir si de wi gseit witer uf Durben, hei üses Outo abgäh unis när dürne sehr guet organisierte Flughafe zu üsem Geit ufgmacht.

Der Flug isch churz u sehr ruehig gsi. Ou mitem Gepack het aues bestens klappt. Ds nöi übernonige Outo chönntme ou aus Schuelbös bruche. Mit 9 Sitzplätz doch ender gross für üs…

D Innestadt vo Port Elizabeth het ufe erst Blick e sehr westleche  Idruck gmacht. Ud Nöchi zum Meer isch sehr idrücklech gsi. Wennme de aber chli a Stadtrand chunnt, nimmt ds Eland zue ud Wohnsituazion isch i grosse Gebiet sehr sehr prekär u beeländend.

Mir si de witer Richtig Addo Elephant Park, wo mir imene sehr gepflegte Guesthouse dörfe loschiere. Umgäh vo Zitrusböim u wunderbare Gärte.

Leider isch ou hie, wi fasch überau uf üsere Reis, der WLan-Empfang sehr beschränkt. U so müesse mir druf vertroue, dass d Föteli ufem Spicherchärtli sicher si. Mittlerwile sis rund 1700… ou d Husufgabe vode Ching si schwär ds erledige. E stabili Verbindig isch wi gseit nume sehr sporadisch müglech.