Hüt simer widermau früech ufgstange. Am Vieri het der Wecker glütet. Dusse isches scho am Dämmere gsi. Nacheme feine Teeli heimeris am Füfi ufe Wäg gmacht i Schluschluwe-Park. E Fahrt vo rund drei Viertu Stung ufemene Safari-Tschipp mit guete 80 km/h mits dür Chue- u Geisseherde isch es Erläbnis für sich. 

Im Park simer vo mehrerne „Pumbas“ empfange worde. Der Park isch landschaftlech es richtigs Heileit gsi. Flusslandschafte, Buschland, chlineri Hügle u grossi Grasflächine wächslesech ab. Näbst ere Büffuherde heimer mängs Breitmunashorn, ganz viu Warzesöi u auergattig chlini u grösseri Tierli atroffe. U immer obe uf de Böim: der Geier, wo lost, wos aus nächschts öpis zfrässe git. 

D Afrikaner si wahri Züguchünige. Wid Hüslischnägge heisi ihres ganze Hab und Guet im u ufem Picöp. Ladigssicherig funkzioniert ds Afrika chlei angers aus bi üs. 

Nachemene feine Zmorge ure churze Siesta heimer e Leivschautig via WhatsApp diräkt ad Steinmann-Familiewiehnachte gmacht. Es het tatsächlech funkzioniert ou wenn d Qualität nid immer optimau isch gsi. Me hät schier chönne meine, mir sigi irgendwo ds Afrika im Busch 😉