Hüt isch e lengeri Etappe ufem Programm gstange. Via Port Elizabeth simer, aus meh oder weniger der Küste entlang uf Stormsriver gfahre.

Ds Ganze isch aber nid ganz ohni Zwüschefau abglüffe. Scho gester hei mir im Nationalpark müesse ds einte Redli pumpe. Es isch nid schlimm gsi u glich isch d Luft geng chli weniger worde. Mir hei üs de entschide, nomau zum Flughafe zur Outovermietig ds fahre. Das hetsech aus gar nid so schlächti Idee use gsteut. Me ischsech ömu de nid sicher gsi, öbmer mit däm Nagu im Pnö no wäre bis Kapstadt cho… U de heimer de haut ds Outo Nr. 3 i Empfang gno. Da me sech ja immer no chli cha steigere isches dismau sogar es Handgschautets gsi. Aber der Res macht das mit links 😉

E Abstächer a südöstlechscht Punkt vo Afrika hetis uf St. Francis gfüert. E wunderschöni Küste mitemene Lüchtturm usem Jahr 1878. E spannende Abstächer id Gschicht vor Seefahrt.

Churz vor üsem Etappeziu ischnis de es witers mau bewusst worde, wi gross ds soziale Gfäu ds Südafrika immer no isch. Uf der einte site d Turischte, wosech aus chöi leiste u unmittubar dernabe Lüt, wo nüt angers hei ussert di dräckige Chleider wosi anne hei. Es isch für üs sehr schwirig, das so hutnach ds gseh. U trotz auem strahle di Lüt e so grossi Läbensfröid, Fründlechkeit u Dankbarkeit us. Sehr idrücklech aber glichzytig ou sehr bedrückend.