Hüt isch der Tsitsikamma Nationalpark ufem Programm gstange. E wunderschöni wiudi Küstelandschaft mi Wanderwäge, Hängebrügge u Sandstränd. Ungerwägs heimer zu üsere grosse Verwunderig der nöchst läbend Verwant vom Elefant atroffe: der Körper in etwa so gross wine Chüngu, so chli ähnlech wines Murmeli. Das wärne de, der Klippenschliefer. Ganz härzigi chlini Tierli!

U de hei mir Schwizer widermau gmerkt, dass üsi Massstäb punkto Naturspektaku vilech chli angeri si… nachere Wanderig vo guet drei Stung (Hin- u Rückwäg) über Klippe, Stock und Stei heimerne de gfunge, dä Wasserfau… Wär scho mau im Luterbrunnetau isch gsi, versteit, das mir irgendwie liecht enttüscht si gsi. He nu, mit Wanderige chani äue ufem Räste vor Reis nüm unbedingt punkte. Nid nume bide Ching…

Mitemene feine Znacht unes paar Rundine Uno heimer e witere unvergässleche Tag unger der Sunne vo Afrika verbracht.