Nachemene witere richhaltige Zmorgebüffe heimeris bezyte ufe Wäg Richtig Nzhaka Tented Camp (Manyeleti Reservat) gmacht. Nach dene intensive Rägefä si d Strasse zum Teu imene erbärmleche Zuestand gsi. Der Ateu Teer isch a viune Orte chliner gsi aus d Schlaglöcher…

Zum Teu simer a Orte düre gfahre, wo d Lüt würklech mit sehr sehr weni müesse uscho. Ds Läbe spiutsech hie grösteteils am Strasserand ab. So isches üs de ou nüm ganz überau wou gsi u mir si sehr froh gsi, simer ohni Panne ads Ziel cho.

Mir si im Camp sehr härzlech empfange worde. Näbst üs hets keni witere Gest gha u so hei mir di ganzi Ufmerksamkeit für üs gha. Es isch schinbar d Flaute vor der Wiehnacht. Üsi Gastgäberin het für üs kochet wi imene Gurmetrestaurant. Mit eifachste Mittu het si Menüs zouberet, wosech jede Choch chönnt e Schibe dervo abschnide!

Der Elvis isch üse Safarifahrer gsi. Mit sehr viu Erfahrig umene risige Wüsse u Gspüri het är üs a Orte bracht, wo mir üs nid hätte chönne vorsteue! We aui angere Fahrer ihrne Gescht e tolli Perspektive hei botte, de isch der Elvis no chli nöcher häre oder het no chli meh Geduld gha, so dass mir einzigartigi Bilder hei chönne mache.

Gschlafe hei mir i sehr guet igrichtete Zäuthüsli. Eifach aber gmüetlech. Wennmer am Abe nach der Safari und em Znacht si ga pfuse, simer vom Elvis bis vore Igang vom Zäut begleitet worde. Es heig öpe mau Elefante, Affe oder angeri Tier im Camp. U womer de am nächste Morge ca. 500 m vom Camp äwäg Fuessspure vome Löii hei gfunge, heimers de no chli meh gschetzt.

Es si unvergässlechi Täg gsi, wo mir, zmits ir afrikanische Buschlandschaft hei dörfe erläbe. E Gastfründschaft wome chum cha überbiete. Eifach grossartig!