Am Vieri am Morge simer ufgstange zu üsere letschte Safari im Manyeleti Resort. Vode Big 5 hei üs no d Büffle gfäut. Das isch füre Elvis fasch ds grössere Problem gsi aus für üs. So heimer rund zwo Stung sämtlechi Wassersteue vom Park abgsuecht. Ohni Erfoug. Wo mir grad gmüetlech am Giraff u Nashorn fötele si gsi, isch de der füre Elvis erlösend Funkspruch cho, dasme het Büffle gsichtet. De hetsech der Elvis i sim Sitz ganz chlii gmacht u ds Gaspedau vou düredrückt… U so hei mir ou di Büffle chönne gseh, wo aui sit Tage dervo hei gredt.

Nachem Zmorge si mir de zytig ufbroche Richtig Eswatini. Der Wäg het houprig agfange. Fählendi Brügge, Erdstrasse mit riisige Schlaglöcher u immer wider Chüe uf der Strass hei für zuesätzlechi Umwäge gsorget uds Vorwärtscho verzögeret. Nach rund Füfehaub Stung simer ds Eswatini ad Gränze cho.

Dert simeris vorcho wi i däm Asterix-Fium mitem «Passierschein A38». Zersch registriere, uf Papiir wouverstange, när Stämpu uf Südafrikasite, när überd Gränze, när Stäpu uf Eawatinisite, Outo amäude, Outo zahle ad Schranke zu Eswatini fahre, d Outoquittig abgä u de ireise. Das wär aus kes Problem gsi, wenn mir nid füf vor Vieri wäre dert gsi usi am Vieri d Gränze fürd Outo zue tüe. Es hetsech nume am Afang ganz chli Hektik usbreitet aber die hetsech mit zuenähmender Azau Beamti de wider gleit.

Ds Hotel heimer ersch im zwöite Alouf gfunge. Der Sicherheitsposte vorem Eswatinische Chünigspalascht hetis mit Gwehr uf der Schultere der Wäg zeigt.

So simer de, nachere Huszuefahrt wi im Momänt zwüsche Durebuehl u Houtere, woubehaute im Hotel acho und gniesse jetzt ds schöne Zimmer und ds guete Ässe!