Nacheme feine Zmorge usem Weck-Glesli simer zytig ufbroche. D Zuefahrt zum Hotel, wo scho bi üsere Areis isch imene desolate Zuestang gsi, isch dür di intensive Rägefäu ir Nacht nid würklech besser worde. Mir si froh gsi, heim mir e Toyota Hilux!

Nach rund zwe Stung fahrt uf schier ändlose Strasse fasch ohni Vercher simer ar Gränze acho. E Stämpu i Pass u fertig! Am südafrikanische Zoll no gschwing der Pass zeige u de heimer scho chönne witerfahre. Erstunlech aber wahr. 

Ufem Wäg zu üsere nächste Ungerkunft simer a risige Ananasplantage verbi cho. U de heimer gmerkt, dass üser Ching ir Schuu äue doch meh lehre ausme mängisch chönnt meine. Ds Thema Ananas schint ihne uf jedefau bestens glöifig ds si. 

Bir üsere nächste Ungerkunft handlet sechs wider umenes Zäutcamp. Aber eis mitemene extrem höche Ständert mit Terasse u Badwanne. Erstunlech, wasme hie ir südafrikanische Buschlandschaft aus fürd Turiste macht. 

Gspannt uf die nächsti Safari höcklemer am Namitag gmüetlech vorusse bi agnähme 25 Grad.