Bereits simer zu üsem letschte Hotel ufbroche. Wunderbare Küstestrasse entlang ufem Wäg ads Kap der Guten Hoffnung. Lang isch nid klar gsi, obmer überhoupt chöi dert abe fahre. Sit Tage heisi mit Busch- u Waudbränd ds kämpfe gha. U der extrem Südwind het di ganzi Situation no zuesätzlech verschlimmeret. Es het Strasseabschnitte gä, di si gsperrt gsi. Der starch Luft het der Sang so verblase, dases kes Dürecho meh het gä. D Südafrikaner si sehr gmüetlechi u entspannti Lüt. U ade Wiehnachtsfiirtage geitme offebar wenn immer irgendwie müglech a Strand. De wärde d Outo uf beidne Strassesite uf der Strass eifach abgsteut. Da wärde ou mir Öiropäer outomatisch entschlöiniget. Ömu mindestens ds Fahrtämpo wenn ou chli weniger der Puus… Ungerwägs heimer uf de Steine nid wit vom Strand äwäg di erste Seelöie gseh. Das het de d Stimmig wider besseret.  

E gueti Stung het ds Astah vorem Nationalpark duret. Offebar si glich nid aui am Strand gsi… Ud Löschhelikopter si nid wit ewäg ununterbroche gfloge. Es sehr spezieus Gfüeu. 

U de heimerne ändlech gseh, der historisch Lüchtturm ufem Kapfelse. Obe acho heimer de gmerkt, was starche Südwind isch. Es het eim schier vode Bei gluftet. Wär Wärt ufene gordneti Frisur leit isch hie definitiv fautsch. Sehr idrücklech u unger dene Bedingige berchöme d Löscharbeite nid wit ewäg nomau e ganz angeri Bedütig. 

Der Wäg id Houptstadt isch de nüm wit gsi. Aber ou dert hets enorme Wind gha. Im Hotel hets pfiffe fasch wi ire aute SAC-Hütte.