U scho ischer da gsi, der letscht Tag vor der Heireis. Es isch wunderschöns Wätter gsi u derzue fasch windstiu. Perfekt fürne Usflug zum Wahrzeiche vo Kapstadt, em Tafubärg. Mit de praktische Hop on Hop off Bösse heimeris ufe Wäg gmacht. Scho vo Witem heimer gseh, dasmer äue nid di Einzige si, wo das im Sinn hei. Gfüeut au die wo nid entwäder am Strand oder am Kap si heisech ire endlose Kolone der Bärg ufe gschlänglet. Obe acho heimer öpis gseh, das het d Vorstelligschraft vo üs aune überstige. E Mönscheschlange so läng, dasme nid het gseh, wo ds Ändi isch. Gschetzti Wartezyt: mindestens 4 Stung. U das wouvestange bi guete 30 Grad ar bräntige Sunne. Grund: d Seilbahn isch di letschte 3 Täg wäge Wind zue gsi… Ds viu für üs. U so heimer de e gmüetleche Seitsiing-Tag ds Kapstadt gmacht. Aber ou daderbi ischme vor Überraschige nie ganz gschützt. Ar Küste het plötzlech d Lea, si isch scho di ganze Ferie üsi Tierentdeckerin Nr. 1, Delphine entdeckt. Unbeidruckt vode Jetskis heisi dert ihri Rundine dräit. Es witers Heileit uf üere Reis! 

D Böstur rund ume Tafubärg isch de statt eire fasch drei Stung gange. Wi mir scho am Tag vorhär hei festgsteut, isch der Strand wichtig. U wennme ds Outo wot absteue, de machtme das. Da hiuft ou ds Hupe vom Bösfahrer nid. Me mues Prioritäte setze. U die lige eidütig bim Strand u nid bim Strassevercher. Ou wed Wassertemperature mit ca. 14 Grad eher frostig si. 

U so heimer der letscht Ferieabe bimene feine Znacht lah usklinge.